Jemdogdog

陰陽眼

陰陽眼有分天生既, 也有後天既, 今日要講既係: 後天既!

朋友A先生+我+我BF識左10幾年, 年青時我地成日去行山露營, 唔同既係, 我果時同現在既BF唔熟, 所以同A先生既露營, 多數有BF就無我份, 始終班底唔同, 話說露營既時候, A先生同我地講左好多撞鬼見聞, 最近同BF講開先知, A先生當時既陰陽眼係點得黎呢? 原來同我BF有關!

話說當年10零歲既A先生, 年少氣盛, 完全唔相信呢個世界有鬼神之說, 仲話有既話都想見下, BF話見佢咁大口氣, 咁O岩佢地又遇到開眼之物: 牛眼淚, 所以就幫A先生搽左! 好多人以為, 牛眼淚係搽係 eyeshadow 果D位置, 其實係錯架, BF話正確係要搽係眼袋位置對下, 鼻側左右, 果個位係”慧眼”, 搽牛眼淚其實係要開”慧眼”, 至於仲要唔要唸D咩咒, 我就無問到, 但可以維持幾耐呢? BF話唔係搽完洗左佢就無事, A先生差唔多9個月先唔再睇到, 所以真係唔好亂試!

A先生既見鬼故事, 我唔記得同JEM哥錄音時有無講過, 如果無既我可以係度講番!

話說有一次, 我地成班10幾人(我BF無份), 一齊去左西貢海下灣個沙灘露營, 當年漁護處唔會點捉D在沙灘紮營既人, 而當年既海下灣都比較原始和自然, 我地成班人, 煮完飯食飽飽, 就當然圍埋一齊講鬼古丫, 我地10幾個人圍左個圓圈係沙灘度坐, 當時A先生就坐我隔離, 而我同佢既位置就係背住個海, 面向D營同後面既小樹林.

A先生當時係做建築地盤既, 佢話有一次, 佢做既係一個公屋屋苑, 冬天黃昏5點幾6點收工, 成班人一齊走, 但佢人有三急, 就呢埋一二邊解決, 到佢解決完, D工友都走晒, 佢一路罵佢地無義氣, 一路自己一個人走, 你知丫D未起好既公屋, 無燈無電梯, 只能行樓梯走, 冬天6點鐘已經好黑, 好彩唔係高, 只係5樓, 佢又無電筒, 唯有慢慢小心D行落去, 落左2層, 佢見轉角位有個人坐左係地下, 衣衫襤褸, 爛身爛勢咁, A先生經過佢身望清楚, 見到佢係阿伯黎, 好老好多皺紋, 雖然好夜但都睇到佢塊臉好白, A先生無理佢繼續行, 心諗咁早已經有道友走上樓上電? 呢個時候佢已經行左落下層, 佢再回頭望番上去, 阿伯已經唔見左!!! 地盤個地下咁多垃圾, 要離開時點都會有聲掛? 但阿伯竟然無聲無息咁消失左, 係人係鬼大家心照丫! A先生當然就極速9秒9跑落樓丫!

—————————————————————————————————————————————

當佢講完之後, 我自己就無咩驚既感覺, 因為我覺得好奇怪, 我望到正前方, D營既後面, 有D矮樹, 隨住涼風輕輕晃動, 但點解其中一棵樹, 動得特別厲害, 風吹時彎得特別低呢? 總之感覺就很奇怪, 和其他樹不同, 我低聲問A先生: 點解棵樹咁怪既? A先生就叫我唔好問, 遲D先講, 以我”大8掛”既性格知道一定有料到, 於是睜著”金睛火眼”望住棵樹, 可惜無論我點望, 都係咩鬼都睇唔到, 呢個時候A先生就話夜呀不如早D瞓, 於是大家都散會各自入營瞓覺! 而我又點會放過A先生呢? 當然係捉住佢, 佢唔講清楚我就唔比佢瞓丫!(我咁惡, 哈哈!) A先生於是細細聲同我講, 樹上有個白衫既女人, 係度聽我地講鬼古, 不過應該無咩惡意既, 純粹8掛, 叫我唔好理, 唔好講比其他人聽, 費事嚇親其他人!

呢個”古中古”我有諗過真定假, 因為A先生果段時間聽佢講真係”見到野”, 但樹上係咪真係有鬼? 定佢只係想快D瞓覺而是但作D野黎打發我走? 就等各位自行判斷了!

夢娜診的古靈精怪

舊朋友的鬼故事

是日要分享既係, 一個舊朋友的幾個鬼故事:

(一)
朋友於十幾歲時, 有一晚瞓瞓下覺半夜醒左, 佢張開眼睛, 望出窗外, (佢住十幾樓, 張床側面對住書桌, 書桌上有個大窗) 淡淡的燈火映照, 竟然發現窗台有對手係度, 朋友形容, 對手好多皺紋, 係老人家黎, 好似D人就跌落街, 死命爪住窗台咁既樣! 呢個時候有個頭仲要慢慢申出黎, 對手就好似撐起個身上黎咁, 佢睇到一個阿婆, 個頭慢慢……….慢慢咁申上黎, 對眼望住佢, 佢好驚, 大被蓋過頭, 唔敢再望, 係被入面震左成晚, 真係嚇到病左成個星期, 佢講左比阿媽知, 唔知阿媽係咪幫佢做左D野, 後來病好左都無事了!

(二)
朋友後來去左澳洲留學, 有一晚同4個香港留學生出去酒吧飲酒, 其中有個同學有揸車的, 佢地吹水吹到好夜, 個個都飲左少少酒, 回程時, 經過路口一支街燈, 街燈下有個金髮鬼妹企左係度, 低著頭, 白色修身長裙, 睇得出身材玲瓏浮凸, 果時真係好夜, 成街都無人, 佢地幾個後生仔, 無咩惡意, 只係飲左少少酒, 膽粗粗想撩下女仔, 於是停低架車口花花咁問個女仔做咩咁夜一個係條街度, 不如車佢返屋企, 點知問左幾句個女仔開始喊, 低住頭慢慢抬起, 原來個女仔有半邊臉腐爛晒, 血肉模糊, 有隻眼珠仲要無左, 得一個黑洞, 佢地嚇到V娃鬼叫, 揸車果個學生好驚即時想走, 佢一開車真係手震, 架車即時衝左上對面行人路, 好彩都無咩事只係有D皮外傷, 佢地4個再望番轉頭個金髮女仔已經唔係度, 呢個時候都唔敢再揸車拿拿臨跑番去宿舍就算!

(三)
朋友畢業回港之後幾年, 有一次係油痳地眾坊街中華書局買書, 買完出番黎係黃昏5點幾, 天都未黑齊, 佢係街口見到個男仔沿眾坊街相反方向行, 佢忽然間醒起果個係當年一齊係澳洲撞鬼其中之一個同學, 就諗住返轉頭同佢打招呼, 點知回頭一看跟本就無人, 同埋果條係掘頭路黎, 跟本無得走, 最得人驚既係朋友後來問番D舊同學, 先知果位同學仔無幾耐之前為情自殺死左, 係咁真係唔知佢果次係撞其他鬼定撞番舊同學既鬼魂呀!!!

夢娜診的古靈精怪

地獄遊記 (下)

個女仔既靈魂落到去, 情況同師傅講既一樣, 紅褲頭留在原地數錢, 藍褲頭為左聞酒香, 就負責帶個女仔去遊地獄, 因為無人可以同個女仔落, 所以個女仔一路睇到既情況佢都要一路講出黎, 個女仔話, 去到條大街, 人來人往, 有老有少, 係實體的, 同正常人無異, 條街好清潔, 好舒服, 中式建築的, 有亭台樓閣, 不過沿路無食店, 無7仔, 無 bank, 無 shopping mall, 提佢果位朋友會不停叫個女仔, 唔好食野, 唔好拎任何野! (註一)

個女仔話, 藍褲頭好盡力留住佢同討好佢, 請左佢去一個花園入面坐, 又請佢食野, 雖然提佢果個已經不斷係佢耳邊叫佢唔好飲食, 但係個女仔都忍唔住, 食左隻雞骴同飲左杯水, 到左差唔多時間, 朋友耳邊提佢返黎, 藍褲頭帶番佢去地獄入口, 最攪笑既係紅褲頭仲好努力數緊錢!

一返到黎, 個女仔已經話食左野, D水仲好清甜, 我BF正想責怪佢, 佢已經黎料, 嘔吐大作, 嘔既係黃泥水+紅蠟燭 @@, 足足嘔左大半個膠桶, 睇見都辛苦!!

最神奇既係, 當個女仔同佢2個朋友離開左辟魔圈不久, 辟魔圈就自己著火, 由頭燒到尾, 一圈燒晒D字, BF話師傅同佢講, 呢個時候係最危險既, 因為陰界同陽界既缺口正要關閉, 所以時間一定要好準確, 遲左個女仔就返唔到黎架呀!!

(註一) 師傅話過, 拎左陰間D野係要還既, 輕則減壽, 重則無命, 而點解個女仔睇唔到果D鉤脷火燒既酷刑呢? 因為鬼差只係地府入面最低等既 post, 你唔係死人, 只係黎遊玩, 又比左咁多(溪)錢, 佢都唔想你有事, 加上你係非法入黎玩, 出左咩事佢地要”咩飛”, 所以只會帶個女仔去最安全果層, 係D人準備投胎, 短暫停留果層, 所以先咁舒服同靚囉!

夢娜診的古靈精怪

地獄遊記 (上)

話說有一次我BF同師傅去左大嶼山X寺探方丈, 其中有個女善信求緊方丈一件事, 原來呢位女善信既父母於方丈有恩, 今日呢個女善信係黎求方丈, 帶佢去遊地獄!!!

方丈正愁眉不展, 因為以佢既功力, 只能幫到個女仔去, 但未夠功力帶得到佢返, 當方丈見到師傅, 就話:緣份! 因為師傅是有能力做到的, 經過方丈和師傅雙方同意下, 方丈當係”還恩”, 答應左呢個女仔!

首先, 雖然師傅係有能力, 但也只能帶一人(即係個女仔)落去, 其次, 除左個女仔, 佢旁邊仲要坐多2個人幫個女仔手, 一個負責係女仔耳邊作出提示和警告, 一個負責不停燒溪錢!

師傅先同個女仔講一次個流程, 當鬼門打開, 女仔落到去, 會見到鬼差2個, 一個係紅色褲頭帶, 一個係藍色褲頭帶, 紅色褲頭帶那個是貪豺的, 藍色褲頭帶那個是好酒的, 首先個女仔就要比袋錢紅褲頭, 紅褲頭就會留在原地一路數錢, D錢一定要源源不絕咁供應, 等佢一路數都數唔完, 另外都要預備一支酒, 用燈芯做引點著佢, 等D酒香圍繞住個女仔, 藍褲頭因貪聞酒香, 就會負責帶個女仔四圍參觀!

一切準備好, 時間只有一支香, 支香燒完之前就一定要返黎, 方丈先用朱砂, 在地上以梵文手寫一圈, 名為”辟魔圈”, 因為落地獄只係個女仔既靈魂, 呢段時間佢既肉身會處於真空狀態, 為左保護佢既肉身, 唔想比外來物黎”奪舍”, 所以個女仔要坐係辟魔圈內, 燒溪錢和作提示的另外兩人都一樣在辟魔圈, 坐係女仔隔離, 落去的, 只有個女仔既靈魂, 師傅係圈外作發, BF同方丈守住辟魔圈外圍, 地獄之遊正式開始!

(因小妹明日晨咁早要去見工, 雖然預左見唔成, 但都要同BF交代, 今晚早D瞓, 明日再出埋佢! 見諒!)

夢娜診的古靈精怪

散功

話說我BF係會用水晶作為修煉既, 係佢20幾歲某年, 玩水晶正正就係香港既潮流, 好多人都走去買, BF其中一個師兄(註一), 無意中搵到一大舊好有靈氣既水晶, 於是打磨左佢, 成為一個”玉蒲團”, 用佢黎打坐修煉!

開頭果10幾日, 師兄佢都覺身上真氣流動, 打完坐之後功力大進! 但漸漸師兄開始愈來愈瘦, 仲要開始脫髮, 精神也大不如前, 好容易攰, 成個樣就好似生癌做緊化療果D病人咁, 非常唔對路!

果時我BF師傅已經另有發展, 唔係香港, 佢地10幾個師兄弟一齊分析, 結論就係: 玉蒲團既靈力太大, 師兄一個人受唔晒, 所以出現如此反應!

當年, 佢地成班師兄弟, 成日都會去大嶼山X寺修煉, 亦都同X寺既老方丈好熟, 於是師兄就搬左個玉蒲團去X寺, 師兄坐在玉蒲團上, 10幾個師兄弟, 圍一個圈, 手拖手, 幫師兄散功, 將佢身上既功力分番比10幾個師兄弟平均承受!

事後呢個玉蒲團, 佢地就留左係寺內, 因為”無咁大個頭, 唔敢戴咁大頂帽”, 以佢地既功力真係無人可以駕馭得到呢個蒲團, 而師兄散左功後, 健康亦慢慢回覆正常了!

BF話, 大嶼山X寺自從老方丈死左, 而家已經唔再對外開放, 至於個玉蒲團而家仲係唔係寺內, 就真係不得而知呀!

(註一)
BF其實有10幾個師兄弟, 但當年佢師傅只收左我BF一人, 其他所謂的師兄弟, 都係師傅D朋友/戰友所收既徒弟, 因為師傅其實係越南華僑, 細個外出買野時, 屋企比炸彈炸中, 全家10幾人死晒, 死剩佢一個, 跟住比越南某寺廟主持收留左, 主持傳佢經書 (本經書之後傳比我BF, 我BF又再傳比下一個), 後來又打過越戰, 係一個殺人不眨眼的軍人, 所以佢有好多戰友, 黑白兩道都識D人!

大嶼山X寺

夢娜診的古靈精怪

命定

講番我BF同佢師傅, 佢地係註定一定要做師徒既, 話說我BF當年十零歲, 好鍾意一個人四圍去露營, 有一次佢去左一個地方露營, 去到已經有一個營係度, 咁我BF就照紮營, 成個地方都無人, 只係得我BF同對方個營, 呢個時候有個30幾歲既男人拾左好多柴返黎, 仲分D比我BF, 佢地2個就傾起上黎, 天南地北, 最後講到術數, 我BF當時是毫不相信的, 後來我BF瞓左, 瞓醒對方已經走左!

半年後, 我BF去另一個地方, 佢又再撞番呢個人, 呢次開始, 佢地交換左聯絡方法, 相約他日結伴去露營, 佢地去左幾次露營, 開始熟落, 之後有一次, 呢個男人帶埋我BF, 去一戶人家屋企睇風水及睇面相, 當對方比左佢時晨八字比呢個男人, 而佢又好精準咁從面相和八字計算出好多野, 我BF就話: 有無咁神奇呀? 你真係算到我既, 我就跟你學, 同埋拜你為師!!!

於是我BF就比左自己既時晨八字呢個男人, 呢個男人計好之前, 就比左12個錦囊我BF, 講到明叫我BF應承佢, 只能每月月底拆一個, 我BF好記得, 果時係4月, 到左5月1日, 佢拆開左4月個錦囊, 寫住:升職加薪! 中左喎! BF心諗, 4月加人工, 估中好正常丫! 到左6月, 拆5月個錦囊, 寫住:大病一場! 又中喎, BF5月時因扁桃腺發炎, 入左醫院! 佢開始有少少動搖, 但都諗, 咁O岩撞中咋! 到左7月, 拆6月個錦囊, 寫住:父親入院, 仲要括住寫:肺有事, 佢開始有D驚驚地, 但後生仔, 唔信邪! 佢就做左個決定: 偷睇! 佢拆埋7月個錦囊, 點知睇完, 佢直頭呆左, 你地估下寫D咩? 原來係4個字:

.

.

.

.

.

.

.

.

.

.

.

言而無信!

我BF真係唔敢再拆, 仲要心服口服, 到左8月, 我BF就正式奉茶跪地, 拜呢個男人為師, 尊稱佢做師傅, 開始展開佢人生既新傳奇!

後記一: 拜左師之後幾個月, 我BF有次開番之前D錦囊睇, 8月果個真係寫住: 拜師學藝, 但其他錦囊既內容就唔記得呀!

後記二: 師傅其實係密宗的, 佢地有本經書, 係要傳比後人及收徒弟的, 至於要傳比咩人, 書入面係有提示的, 好似師傅傳比我BF, BF同我講, 書入面寫住, 某年某月某日, 師傅果日遇到既所有人, 其中一個就係佢命定既徒弟, (就係我BF第一次遇到師傅果日), 咁邊個先係呢? 經書提到, 半年後師傅會再遇到呢個人, 好明顯呢個人就係我BF呀!

夢娜診的古靈精怪