到咗美國後,我在紐約定居.由於我只讀到中五,不能直上大學(美國小學+中學共12年),所以只可以入讀兩年制大學(類似香港嘅副學士).記得考入學試,啲英文9成睇唔明,成績當然唔好,但數學真係易到痺,有冇想過大學入學試會考你普通加減數吖?我仲諗,甘易?會唔會陰我架!?最後,英文肥咗,要讀ESL班(English Second Language), 有4級,pass 晒先至可以讀正常嘅英文班.好多新移民都要讀,而有唔少同學仔因為過唔到,就算攞齊credit都唔可以畢業,但我問過啲鬼佬friend,佢地take都未必可以pass呢!我讀書嗰陣通常都係用單車返學,有一次經過海軍嘅招募中心(喺美國,四大部隊都有佢自已嘅招募中心,多數開係地舖,方便招募),有個鬼佬說我入伍,但當時我只想快啲讀完書,快啲返香港,所以冇理到佢.直至到2年後,我仲未完成ESL,有啲心灰,其實因為當時我英文唔得,有啲怕同鬼佬溝通,自然傾向同中國人玩,英文進步有限,好似去到樽頸位,冇突破.而當時溝女,又俾人佢絕.加上屋企有問題,唔想再同老豆住.係幾方面嘅失意下,有個海軍招募人員叫Tony(中國人),俾佢遊說下就改變咗我嘅下半生. 留意下回:Tony究竟用乜嘢昆我入伍呢?
US NAVY 港兵雷奧
由細到大,我都好憎英文,讀極都唔入腦.小學嘅時候,試過成績差俾英文科嘅阿Sir咬(我估佢變態的,成日咬人),唔知係咪甘,更加唔鐘意學英文.但我阿嫲喺我好細個嘅時候已經移民去美國,我知道自己終有一日會去.但日子一天一天過去,都未有得去,到我中學嗰陣,仍然無心向學,會考時仍然狂煲 “三國志”(超任game,70後應該玩過).唔怕話俾你哋知,我會考只得2分!(千祈唔好學我甘呀!).當時只希望求其讀完,快啲出去揾錢.之後我去咗舊機場貨運站做文員,從此同飛機結緣.到咗我21歲,領事館終於叫我去interview,記得當時個領事問我去到美國想做乜,我話想去讀書,因為出過嚟做嘢,知道學歷嘅重要,喺機場想升掃把(Supervisor)又升唔到,心諗過去浸幾年點都掂掛.於是喺97年嘅夏天,香港回歸時飛去美國,開始我9年嘅歷險! PS.唔知係黑仔定係貴人出門招風雨,甘橋打大風,我等咗幾日先上到機,啲friend仲話:你走能到未呀,送機送幾日你都未走得架??!!
US NAVY 港兵雷奧
到咗美國境内,即刻俾人玩.海關嗰條友check我啲行李,佢講得太快,唔知佢講乜,甘我咪yes,yes甘答佢,點知中招啦,佢攞張圖出嚟,原來問我有冇帶危險品,老虎都答冇啦.之後佢就玩嘢,佢唔係摷我啲嘢,而係將我啲嘢拋晒落地下,問我做乜帶甘多嘢入境.大佬呀,移民緊係帶晒自己啲重要野過去啦,帶多幾件衫,又懷疑我攞過去賣.頂,第一次真正知道乜嘢叫做書到用時方恨少,俾佢兇多兩兇,答都唔識答,咪話shopping囉,甘就PK咗,佢馬上寫張ticket俾我,要打$100入口稅,頂,無厘頭俾人罰成百銀美金,唉,自己又唔識解釋,唯有焗俾啦,俾咗先至可以攞返啲行李. 嗰條海關友將我啲嘢“踢”埋一邊,我俾張收條佢,之後自己死死氣氣甘執返自己啲嘢.講真,罰我錢冇計,只怪自己英文唔掂,但係都唔駛將我啲嘢又拋又踢架?甘大個人,第一次俾人甘“烚”.
US NAVY 港兵雷奧
今日同大家講講美軍的五大部隊:
首先講下軍階,主要分為士兵及同軍官級.中學畢業只可以入士兵級,接受綠卡人仕入職,等級由E1到E9.而軍官級最少要大學畢業,亦一定要入咗美國籍至可以申請,等級由O1到O9,可以叫管理層,而地位和人工較高,例如機司和指揮官就一定係軍官才可以做.簡單嚟講,士兵級最高的E9亦要聽從O1嘅order.而各部隊的軍階是相同的,只是不同軍種. 閱讀全文…
US NAVY 港兵雷奧
