阿診的古靈精怪: 上身
上身
呢件事發生係我 Form 2 既時候, 我又係唔記得有無係節目度分享過, 有既希望大家都睇多次!
話說當年我仲係青春少艾一舊飯, 有一日星期五晚, 阿媽叫左我去佢個”道堂”幫手包禮物, 先講我阿媽, 當年有份工時固定既正職, 收入又穩定, 反之我老豆係做服務性行業, 收入高之餘但放假既時間就同阿媽唔太一致, 當年阿媽有D朋友係信道教, 假期就會去道堂穿起套”道士衫”修煉, 你問我呢舊飯就當然唔知佢地修煉D咩丫, 相信我阿媽都未必知道, 可能純粹無聊, 打發時間, 又或者係搵到D心靈上既慰藉吧!
講番果晚, 因為星期六係觀音誕, 果日會有D禮物派比善信, 所以我星期五晚既任務係: 幫手包禮物! 我好記得果晚8點幾去到道堂, 阿媽就介紹呢個介紹果個比我識, 其中有個後生女, 阿媽話佢係做護士既, 但因為入門早過我阿媽, 所以阿媽叫佢做”師姐”, 我果時已經心諗阿媽你咁既年紀, 竟然有後生女叫你做”師妹”, 真係瞓著都笑番醒 :p 唔怪得阿媽咁勤力返道堂呀!
我記得包到10點左右, 後面傳來”嘭”一聲, 原來護士師妹忽然暈低左, 幾個師兄師姐夾手夾腳扶起佢坐在椅上, 又要小心佢右腳, 事關護士師妹原來扭親右腳踝, 睇完跌打包到一大舊, 點知佢都未坐定, 忽然間企左起身, 仲跳左上桌上, 動作不知幾靈敏, 仲要不停抓身抓勢, 好似身痕咁, 完全唔似之前斯斯文文既佢!!! 十足十城門水塘既馬騮咁!!!
我當時真係嚇到呆左, 但佢地D同門師兄師姐又見怪不怪咁, 完全當無回事, 跟手仲拜神問卜, 原來護士師妹係”齊天大聖”上身, 阿媽同我講, 原來遇上D咩咩”寶誕”, 天宮D神神佛佛就會落黎凡間, 而因為D師兄師姐平時有修煉, “功力深厚”, 佢地通常都會請到天神上身, 而D天神係上開果個人就係果個人, 唔會轉的, 因為呢位護士師妹已經比”齊天大聖” mark 左, 所以一向都係大聖爺上佢身, 但寶誕未到, 又未請佢落黎, 點解無那那上佢身呢? D師兄問左卜, 原來係大聖爺貪玩, 未等到寶誕正日就走左落黎凡間, 我見住呢位”傷腳師妹”不停跳上跳落, 心中只有恐懼, 當時已經覺得非常不妥, 跟手就同阿媽講要返屋企, 唔想再睇落去!
個人覺得, 我地有肉身, 有靈魂, 肉身就好似我地間屋, 靈魂就住係入面, 正常情況下, 只有我自己先有屋企鎖匙, 但當你去求鬼神, 玩果D所謂神打, 請神, 其實就係邀請佢地入你屋企, 去得一兩次, 佢地就有機會搵到自由出入既方法, 到時佢地就可以控制你既思想, 甚至趕走你靈魂, 侵占你肉身, 所以奉勸各位, 呢D野真係玩唔過! 呢件事比到好大既啟發我, 就係做人一定要保持神智清醒, 就算年青時點蒲點玩, 啪丸毒品我點都唔食! 我唔敢講果位”齊天大聖”係真神定假鬼, 總之果種”自出自入”既感覺令我非常不安, 唔知阿護士師妹清醒之後, 隻腳會唔會傷多幾錢重呢?
一年後我老豆開始唔夠工開, 多左時間係屋企, 就嘈阿媽成日沈迷道堂, 有老婆=無老婆, 嘈到差唔多離婚, 我阿媽先至無再去, 而我自從呢次經歷之後都唔想再上去了!
