阿診的古靈精怪: 問米
問米
呢件事因為年代久遠, 所以呢幾日我都花左少少時間去整理, 諗清楚D細節, 件事係發生於我六年班既時候, 因為果時屋企好多野都唔順, 弟弟又成日病, 咁我阿?就走去問米, 我阿嫲佢唔識字, 家中我係大女, 基本上去邊度都會捉我去陪佢搭車帶路!!!
個地點我仲好記得, 係深水埗, 高登老麥斜對面D唐樓, 唔記得係3樓定4樓, 總之D樓梯就好黑, 果時係夏天黎, 去到見到個40零歲既女人, 佢就係問米婆, 果時我仲好細, 無接觸過問米既資料, 到大個左, 睇左D港產片, 發覺電影同現實真係好唔同, 第一當然係問米婆既年紀無”聖羅蘭”咁大, 第二就係個過程, 間屋我只係記得好黑, 無開燈, 有個大騎樓, 光源主要係靠出面既陽光照入黎, 屋內擺設都好簡單, 有個神台仔, 但唔係滿天神佛果隻, 係好普通既民居, 廳度放張四方摺台, 我地3個人就圍住張台坐, 台上有個小盤, 有隻細碟, 碟入面有D水, 另外仲有碟米, 同埋一舊溪錢, 仲有點香一支和一對紅蠟燭, 開始既時候, 問米婆問我阿嫲想搵邊個, 阿嫲話佢想搵佢老公, 即係我阿爺, 咁佢問左我阿爺個名, 生時和死時就開始唸唸有詞, 佢燒左度符, 灑左少少米, 跟住見佢開始不停燒溪錢, 係一張一張咁燒, 一面注意小碟入面D水, 跟住無幾耐, 我記得好清楚, 我地入去時仲好猛太陽, 熱到死的, 但儀式剛開始, 個天就愈來愈黑, 問既時候仲行晒雷+狂風大雨, 間屋又愈來愈黑喎, 氣氛真係好恐怖!
咁無耐佢就話見到我阿爺上左黎, 佢既形容我阿爺既外型同衣著是和死時衣服一樣的, 佢話我阿爺講, 好多綿花塞住個肚好唔舒服, 因我阿爺是忽然吐血死的, 所以屍體一定要解剖, 可能解剖完D綿花就咁塞番入肚度掛? 跟住我阿嫲就問左好多細節野都中, 跟住就問屋企點解咁? 阿爺話因為媽媽之前落左個小朋友, 係男仔黎, 佢係下面無名無份無神位無野食, 好慘, 所以就攪我弟弟, 因為當年屋企窮, 阿媽生完我之後又有左, 果時經濟能力唔好, 所以落左個BB, 後來我4歲時媽媽又有左, 因為我大左D環境又好左D, 所以今次有生到, 呢件事問米婆當然唔知丫, 但屋企個個都知, 而我仲細當然唔會講, 果次我都係第一次知道原來我同我弟弟中間仲有一個弟弟, 於是阿嫲就問應該點做, 問米婆就話要幫佢改名, 立個神主牌同燒番D野比佢, 阿嫲後來佢仲問左好多野, 不過我真係唔太記得, 印象中成個過程有成2-3小時, 問完既時候都黃昏, 不過已經無再落雨, 走既時候仲有陽光呢!
