Jemdogdog

掛屍

M先生係我一個老朋友,
住係官塘翠屏村,
早掛M先生話 keep fit
(其實為左識女仔),
想減左個小肚腩,
於是開始每晚放工後食飯前,
走落樓下跑步,
佢多數會跑去”厲鬼城”果頭,
(厲鬼城係我地D口痕友改既,
其實係私人屋苑”麗港城”),
因為果頭比較清靜,
又近海, 其實都幾舒服架!

話說有一晚, M先生約我出黎晚飯,
我覺得好奇怪,
佢唔係要慳錢+跑步+keep fit 咩?
點解無那那約成班朋友出黎?
出到黎M先生既臉色都唔多好,
病病地咁, 佢同我地講,
以後都唔再夜晚跑步了!

M先生話,
頭一個星期開始跑步都好有恆心,
仲愈跑愈有興緻,
不過佢留意到,
每次當佢跑到”厲鬼城”向海果條跑步徑,
佢留意到低層有個單位好古怪,
成個單位發出暗紅色既光,
好似成間屋熄左燈,
得番神台燈著住咁,
而個窗台就有一件黑布掛係出面,
不過太遠睇唔真,
如是者幾晚跑到果度,
個單位都好似無人,
成間屋紅色咁,
呢次佢就有D八掛,
行到去樓下睇,
不過真係嚇死佢,
原來窗台掛住既,
唔係黑布, 而係一把長頭髮黎,
正確D講係一個人將自己個膊頭伸左出窗外,
頭向下, 膊頭向上, 但見唔到個身同對手,
呢個姿勢都幾怪異, 不過最得人驚既係,
呢個人好似知道M先生望緊佢咁,
佢慢慢抬起頭, 用好兇惡既眼神望住M先生,
嚇到M先生即走, 跑番屋企,
M先生事後諗番,
邊有人可以晚晚 keep 住同一姿態?
掛係窗台咁耐?
係人既都腦充血死左丫,
咁係咩相信大家都心中有數啦!

而M先生之後就病左幾日,
跟住運氣都好差,
追唔到個女仔,
無那那唔見左銀包,
公司仲炒左佢,
所以食飯果晚就同大家講左呢件事,
而佢以後就打死都唔會再行去”厲鬼城”果頭了.

jemdogdog 夢娜診的古靈精怪